ordinario

7 urtetik gorako bidaiari ezinezkoentzat

Piqo-Piqo gaztearen mundua fantasiazkoa eta magikoa da. Piraten, yetien, minotauroen eta bestelako izaki mitologiko ausarten leinu baten ondorengoa da mutikoa, eta oasi sinestezin bat du jaioterri; han, diamante erraldoiak lurretik sortzen dira, perretxikoen antzera, eta arrokak bizidunak eta jostariak izan ohi dira. Gaur, beste askotan bezala, Piqo-Piqo deskuidatu egin da eskolarako bidean, ipurtargi lumadun zoragarri bati segika. Gelara iristean sortu duen istripuak maisu erretxinaren pazientzia agorrarazi du, eta etxeko lan ezinezko bat agindu dio hurrengo zientzia-eskolarako: munduaren beste muturrean bizi den elezaharretako olagarro bati hortz bat ateratzea. Lanari ekiteko unea da…

Ferreyra bera uharte batean bizi da, eta abentura zoro bat asmatu du, non pertsonaiak landaretza oparoko ingurunean bizi diren eta ozeano amaigabeak zeharkatzen dituzten. Albumak, bidaia handi bat kontatzeaz gain, bestelako gai batzuk ere jorratzen ditu, hala nola familia, hezkuntza, heldutasuna edota ustekabeko abenturak bizitzera ausartzeko erabaki zail eta korapilatsua. Amaieran, irakaskuntzako profesionalei eskaintzen die liburua egile argentinarrak, gaztetxoekin egiten duten lanaren esker-emate xume gisa.

“Gozamen hutsa da liburu hau. Lucasek irudimen izugarria du, asmatutakoa komikiaren orrialde guzti-guztietan islatzeko duen talentuaren parekoa. Margo ederren eta Ezinezko Uharteko pertsonaia karismatikoen atzean, garai hauetarako altxor paregabe bat ezkutatzen da: inozentziaren eta ontasunaren balioa”.
Pepe Larraz

“Botak jantzi, piraten txanoa egokitu, pintzelak hartu eta berarekin batera garamatza Lucas Ferreyrak, margo akrilikoz sortu duen unibertso zainduan zehar bidaia egin dezagun. Irudimen izugarriko lana da, Terry Gilliam grafiko baten mailakoa”.
Javier Olivares